Tuesday, January 23, 2007

sdf

sdf

Thursday, September 07, 2006

പോകാല്ലോ പോകാല്ലോ മഞ്ഞക്കാട്ടില്‌ പോകാല്ലോ

കണ്ണൂസ്‌ മറ്റൊരു പോസ്റ്റില്‍ കമന്റായി പോസ്റ്റ്‌ ചെയ്ത ഈ പാട്ട്‌ ഇവിടെ എടുത്ത്‌ ചേര്‍ക്കുന്നു. All credits goes to him




പോകാല്ലോ പോകാല്ലോ മഞ്ഞക്കാട്ടില്‌ പോകാല്ലോ
മഞ്ഞക്കാട്ടില്‌ പോയാലോ മഞ്ഞക്കിളിയെ പിടിക്കാല്ലോ
മഞ്ഞക്കിളിയെ പിടിച്ചാലോ പപ്പും പൂടേം പറിക്കാല്ലോ
പപ്പും പൂടേം പറിച്ചാലോ ഉപ്പും മൊളകും തിരുമ്മാല്ലോ
ഉപ്പും മൊളകും തിരുമ്മ്യാ പിന്നെ ചട്ടിലീട്ട്‌ വറക്കാല്ലോ
ചട്ടിലീട്ട്‌ വറത്താലോ, നാക്കില വാട്ടി കെട്ടാല്ലോ
നാക്കില വാട്ടി കെട്ടീട്ട്‌ കള്ളുഷാപ്പില്‌ പോകാല്ലോ
കള്ള്‌ഷാപ്പില്‌ പോയിട്ട്‌ അന്തീം കൂട്ടി തട്ടാല്ലോ
അന്തിക്കള്ള്‌ പിടിച്ചാ പിന്നെ, കെട്ടിയ പെണ്ണിനെ തല്ലാല്ലോ
കെട്ടിയ പെണ്ണിനെ തല്ല്യാലോ അങ്ങേ വീട്ടില്‌ പോകാല്ലോ
അങ്ങേ വീട്ടില്‌ പോയാലോ ജാനുപ്പെണ്ണിനെ കാണാല്ലോ
ജാനുപ്പെണ്ണിനെ കണ്ടാലോ, നാലും കൂട്ടി മുറുക്കാല്ലോ
നാലും കൂട്ടി മുറുക്കീട്ട്‌ കാലും നീട്ടി കെടക്കാല്ലോ
കാലും നീട്ടി കെടക്കാന്‍ കൂട്ടിന്‌ ജാനുപ്പെണ്ണിനെ കൂട്ടാല്ലോ
ആ പോകാല്ലോ പോകാല്ലോ മഞ്ഞക്കാട്ടില്‌ പോകാല്ലോ..

Thursday, July 20, 2006

കവിത - അച്ഛനേപ്പോലൊരു കള്ളനാണെന്നെന്നെ



കവിത - കള്ളന്‍

അച്ഛനേപ്പോലൊരു കള്ളനാണെന്നെന്നെ
ആദ്യം വിളിച്ചതെന്നമ്മ

അമ്മിഞ്ഞപ്പാലു നുണയുന്ന കുഞ്ഞിനെ
അമ്മ വിളിയ്കുന്നു കള്ളന്‍

കൊച്ചൂ കുസൃതികള്‍ കാട്ടുമ്പൊളെന്നെയെന്‍
എട്ടന്‍ വിളിച്ചു നീ കള്ളന്‍

അച്ചനോടമ്മിണി ടീച്ചര്‍ പറഞ്ഞൂ
പഠിക്കാന്‍ മിടുക്കനീ കള്ളന്‍

ഓട്ടത്തില്‍ ചാട്ടത്തില്‍ ഒന്നാമനാകുമ്പൊള്‍
കൂട്ടുകാര്‍ വാഴ്തി നീ കള്ളന്‍

കാമിനീമാരെ കമന്റടിക്കുന്നേരം
"നാണമില്ലല്ലോട കള്ളാ.."

കല്യാണപ്പെണ്ണിന്‍ കരം പിടിച്ചു
ഞാന്‍ ദീപം വലം വെച്ച നേരം
ഇത്തിരിയിക്കിളിയാക്കിയതോര്‍ത്തവള്‍
പിന്നെ പറഞ്ഞു നീ കള്ളന്‍...

അത്താഴമൂണു കഴിഞ്ഞു ഞാ‍ന-
സ്വസ്ഥനാ‍യിട്ടുലാത്തുന്ന നേരം
കള്ളച്ചിരിയോടടക്കം പറഞ്ഞവള്‍
പിള്ളേരുറങ്ങീല കള്ളാ

കക്കാതെ, കവരാതെ, കളളം പറയാതെ
കള്ളനായ് തീര്‍ന്നു ഞാന്‍ പണ്ടെ...

കക്കാതെ കവരാതെ കള്ളം പറയാതെ
കള്ളനായ്‌ തന്നെ വളര്‍ന്നു



ക്യാമ്പസ്സുകള്‍ക്കൊക്കെ വളരെ പരിചിതമായ ഒരു കവിതയാണിത്‌. കുറച്ചേ ഓര്‍മയുള്ളൂ. ആരാണ്‌ സ്രഷ്ടാവ്‌ എന്നും അറിയില്ല.

"കാമുകി ചൊല്ലുന്നു കള്ളന്‍" "ഭാര്യ വിളിയ്ക്കുന്നു കള്ളന്‍" എന്നൊക്കെ ഉണ്ടായിരുന്നതായി തോന്നുന്നു. ഇതിലെ തന്നെ ചില വാക്കുകളും വരികളും ഇങ്ങനെത്തന്നെ ആണോ എന്നും സംശയമുണ്ട്‌.

ഈ കവിതയെ പറ്റി കൂടുതല്‍ അറിയുന്നവര്‍ ഇത്‌ മുഴുവനാക്കാന്‍ സഹായിയ്ക്കും എന്ന് പ്രതീക്ഷിയ്കുന്നു. നന്ദി in advance.


ജൂലായ്‌-21-2006 - രാവുണ്ണിയുടെ സംഭാവന ചേര്‍ക്കുന്നു
ജൂലായ്‌-24-2006 - കുടിയന്‍ സംഭാവന ചേര്‍ക്കുന്നു

Tuesday, July 18, 2006

ശോശാമ്മേ ശോശാമ്മേ...അല്ലേലും നീയാള്‌ ഭയങ്കരിയാ...

("ഓശാനാ ഓശാനാ ....
അത്യുന്നതങ്ങളില്‍ ഓശാനാ...." എന്ന റ്റ്യൂണിലാണ്‌ ഈ പാട്ട്‌. ശരിയ്ക്കറിയില്ല. 4 വരിയേ ഓര്‍മയുള്ളൂ.. വെമ്പള്ളിയ്ക്കൊക്കെ അറിയാമായിരിയ്ക്കും.. അറിയാവുന്നവര്‍ സഹായിക്ക്വോ.. പ്ലീസ്‌ :) )


ശോശാമ്മേ ശോശാമ്മേ
അല്ലേലും നീയാള്‌ ഭയങ്കരിയാ...

കണ്ടകറ്റര്‍ സാറിനെ മണിയടിച്ച്‌..
ടിക്കേറ്റെടുക്കാതെ പോയവളേ

Cho: ശോശാമ്മേ .....

പേരമരത്തില്‍ കയറീട്ട്‌
അങ്ങനേയും ചരിത്രം നീ സൃഷ്ടിച്ചൂ

Cho: ശോശാമ്മേ .....

കെമിസ്റ്റ്രി പരീക്ഷയ്ക്ക്‌ പാസ്സാക്കാന്‍
സാറിന്‌ കിസ്സ്‌ കൊടുത്തവളേ...

Cho: ശോശാമ്മേ .....

വര്‍ഷപ്പരീക്ഷയ്ക്ക്‌ കോപ്പിയടിച്ച്‌
അവിടേയും ചരിത്രം നീ സൃഷ്ടിച്ചൂ

Cho: ശോശാമ്മേ .....

അരക്കൊല്ല പരീക്ഷക്ക് കണക്കിന്റന്ന്..
സാരീലെഴുതി കോപ്പിയടിച്ച കള്ളിയല്ലേ നീ

Cho: ശോശാമ്മേ .....

വരിയ്ക്കാ ച്ചക്കാ നീ മുറിച്ചു വച്ചൂ....
കൂഴാ ച്ചക്കാ നീ എനിയ്ക്കു തന്നൂ
(റ്റ്യൂണോപ്പിച്ച്‌ ദീര്‍ഘവും കൂട്ടക്ഷരവും ചേര്‍ത്തതാണ്‌!)

Cho: ശോശാമ്മേ .....





Edit 7-sep-06 :- വിശാല മനസ്കന്റെ സംഭാവന ചേര്‍ക്കുന്നു
Edit 19-Sep-06 :- azureusന്റെ സംഭാവന ചേര്‍ക്കുന്നു

Friday, June 23, 2006

III - ആ .. തോട്ടിലൊരു പാമ്പ്‌..

III - ആ .. തോട്ടിലൊരു പാമ്പ്‌..

*********************************
ഈ വക ഓളപ്പാട്ട്‌കള്‍ക്ക്‌ ഇവിടെ അധികം പ്രേക്ഷകര്‍ ഇല്ലെങ്കിലും, ഇതൊക്കെ മറക്കാതിരിയ്ക്കാന്‍ എഴുതി വയ്ക്കാം എന്ന് വിചാരിയ്ക്കുന്നു. :)
***********************************

എട്‌ വടി കൊണ്ട്ര വടി തോട്ടിലൊരു പാമ്പ്‌..
(cho) ആ .. തോട്ടിലൊരു പാമ്പ്‌..


ചേരയല്ല മൂര്‍ഖനല്ലാ ചേനത്തണ്ടന്‍ പാമ്പ്‌...
(cho) ആ .. ചേനത്തണ്ടന്‍ പാമ്പ്‌..

കാര്‍ത്തികേയന്‍ നായരുടെ മൂത്തമോള്‌ കാര്‍ത്തൂ..
(cho) ആ ..മൂത്തമോള്‌ കാര്‍ത്തൂ..

കാര്‍ത്തു നിന്റെ തോര്‍ത്തെവിടെന്ന് ഓര്‍ത്ത്‌ നോക്കടി കാര്‍ത്തൂ..
(cho) ആ ..ഓര്‍ത്ത്‌ നോക്കടി കാര്‍ത്തൂ..

കാര്‍ത്തൂ നിന്റെ തോര്‍ത്തെങ്ങാനും കൂര്‍ത്തമുള്ളില്‍ കോര്‍ത്തോ
(cho) ആ ..കൂര്‍ത്തമുള്ളില്‍ കോര്‍ത്തോ...

(ട്യൂണ്‍ മാറി.. )

ആ ... കാര്‍ത്തു വിക്കണ തോര്‍ത്ത്‌ വേണമാ
അതോ തോര്‍ത്ത്‌ വിക്കണ കാര്‍ത്തു വേണമാ...

നാട്ടിലൊക്കെ വിക്കണത്‌ തോര്‍ത്ത്‌
തോര്‍ത്ത്‌ വിക്കണ പെണ്ണിന്റെ പേര്‌ കാര്‍ത്തു

ആ ... കാര്‍ത്തു വിക്കണ തോര്‍ത്ത്‌ വേണമാ
അതോ തോര്‍ത്ത്‌ വിക്കണ കാര്‍ത്തു വേണമാ...

നാട്ടിലൊക്കെ വിക്കണത്‌ മോര്‌
മോര്‌ വിക്കണ പെണ്ണിന്റെ പേര്‌ മേരി
ആ ... മേരി വിക്കണ മോര്‌ വേണമാ
അതോ മോര്‌ വിക്കണ മേരി വേണമാ..

(കാര്‍ത്തു വേണമാ എന്ന ചോദ്യത്തില്‍ ദുരുദ്ദേശമൊന്നുമില്ലെന്ന് ആദ്യമേ വ്യക്തമാക്കട്ടെ. പ്രാസമൊപ്പിയ്ക്കാന്‍ വേണ്ടി മാത്രമാണത്‌) :)

ഇപ്പൊ പെട്ടെന്ന് ഓര്‍മ വരുന്നത്‌ ഇത്രയുമാണ്‌...


ആണി വിക്കണ പെണ്ണിന്റെ പേര്‌ ആനി
കോഴി വിക്കണ പയ്യന്റെ പേര്‌ കോശി
റോസ്‌ വിക്കണ റോസി
മാങ്ങ വിക്കണ മീര
സൂചി വിക്കണ സൂസി
തേങ്ങ വിക്കണ തോമസ്‌
ജവ്‌ളി വിക്കണ ജോയി
ബോണ്ട വിക്കണ ബിന്ദു

പുട്ട്‌ വിക്കണ പാപ്പി
ഏണി വിക്കണ മാണി
റാഗി വിക്കണ റാണി
ബൈക്ക്‌ വിക്കണ ബൈജു


അങ്ങനെ അങ്ങനെ അപ്പപ്പോള്‍ ചുറ്റും നില്‍കുന്നവരെ പറ്റി ഉണ്ടാക്കുന്ന ഓരോന്ന്...

എന്തും പാടാം ആര്‍ക്കും പാടാം ആരെപ്പറ്റിയും പാടാം
***********************************
കലാഭവന്‍ മണി ഇത്‌ ഏതൊ കേസ്സറ്റിലും പാടിയിട്ടുണ്ട്‌, ഭാഗികമായി.

നന്ദി ..ഈ പാട്ടോര്‍മിപ്പിച്ച ഋ സുഹ്രുത്തിനും പെരിങ്ങോടന്‍സിനും, ഈ വഴി മറന്നുവോ എന്ന് ചോദിച്ച വക്കാരിയ്കും.. :)
***********************************

Monday, June 05, 2006

II - ശ്യാമ വര്‍ണ രൂപിണീ.....

രാമ രാമ രാമ രാമ രാമ രാമ പാഹിമാം..
രാമ പാദം ചേരണേ മുകുന്ദ രാമ പാഹിമാം.. എന്ന tune..............

Collegeകളില്‍ വളരെ പ്രസിദ്ധമായ ഒരു പാട്ടാണിത്‌.. study ടൂറിനും മറ്റോളസദസ്സുകള്‍ക്കും അനുയോജ്യം!..


ശ്യാമ വര്‍ണ രൂപിണീ കഠോര ഭാഷിണീ പ്രിയേ..
പ്രേമ ലേഖനം നിനക്കു ഞാന്‍ തരുന്നിതാ പ്രിയേ..

(Chorus)ലാല ലാല ലാല.. ലാല ലാല ലാല ലാലലാ..
ലാല ലാല ലാല.. ലാല ലാല ലാല ലാലലാ..

പ്രേമലേഖനം തരാനായ്‌ അന്നു രാത്രി വന്നതും..
നിന്റെ തന്ത കണ്ടതും പുളീടെ കൊമ്പൊടിച്ചതും..
(Chorus)ലാല ലാല ............................

ആളു മാറി നിന്റെ തന്ത വാഴയ്ക്കിട്ടടിച്ചതും..
വേലിചാടി ഓടി ഞാന്‍ ചാണക്കുഴീല്‍ വീണതും...
(Chorus)ലാല ലാല ............................

കോലാപ്പൂരി ചപ്പലിട്ടു നീ കുണുങ്ങി വന്നതും..
ചോപ്പ്‌ പൊട്ടു തന്നെ ചേരുമെന്നു ഞാന്‍ പറഞ്ഞതും..
(Chorus)ലാല ലാല ............................

പുള്ളിയുള്ള ബ്ലൌസ്‌ വേണമെന്നു നീ ശഠിച്ചതും..
കള്ളടിച്ച പോലെ സിറ്റി മൊത്തമായ്‌ കറങ്ങിയതും
(Chorus)ലാല ലാല ............................
ശ്യാമ വര്‍ണ രൂപിണീ കഠോര ഭാഷിണീ പ്രിയേ..
എല്ലാമെല്ലാം ഇത്ര വേഗം നീ മറന്നുവോ പ്രിയേ?..




EDIT 1: 6/9/2006 വലിയ കമ്മന്റ്‌ പോസ്റ്റ്‌ ചെയ്തത്‌ ചേര്‍ക്കുന്നു

തമിഴ്‌നാട്ടില്‍ പഠിയ്ക്കുമ്പൊഴും ബേന്‌ഗ്ലൂര്‍ ജോലിയില്‍ നിന്നൊരു ooty ടൂര്‍ പോയപ്പോഴും തെലുങ്കനും, കന്നടക്കാരനും, ബീഹാറിയും വരെ (ലാ ല ലാ ല ... മാത്രമെ അവര്‍ക്കു മനസ്സിലായുള്ളൂ എന്നാലും) വീണ്ടും വീണ്ടും ആവശ്യപ്പെടുകയും കൂടെപ്പാടുകയും ചെയ്തിട്ടുണ്ട്‌ ഇത്‌ :)

ഇതു കൂടാതെ നാരായണം ഭജേ നാരായണം... എന്നു പറഞ്ഞു വെറുതെ കൂടെയുള്ളവര്‍ക്കൊക്കെ (മിയ്ക്കവാറും പാര വച്ച്‌) നാരായണം പറയുന്ന ഇന്‍സ്റ്റന്റ്‌ പാട്ടും വന്‍ ഹിറ്റ്‌ ആയിരുന്നു.

ഉദാഹരണത്തിന്‌
(സാറ്‌ അടുത്തു നില്‍ക്കുമ്പോള്‍)

സൈതലവി സാറിനും നാരായണം..
പിന്നെ കമ്പ്യൂട്ടര്‍ ലാബിനും നാരായണം..
(Chorus) നാരായണം ഭജേ നാരായണം...
പിന്നെം! നാരായണം ഭജേ നാരായണം

എന്നും (സാറ്‌ ഒന്നു മാറിക്കഴിയുമ്പോള്‍)

കുപ്പിക്കണ്ണന്‍ സാറിനും നാരായണം...
സാറിന്റെ മയക്കുവെടിയ്ക്കും നാരായണം
(Chorus) നാരായണം ഭജേ ..

എന്ന ചേലിനാണ്‌ ഈ പാട്ട്‌
*1 കുപ്പിക്കണ്ണന്‍ - കട്ടി സോഡ ഗ്ലാസ്സ്‌ കണ്ണട വച്ചതുകൊണ്ട്‌ അങ്ങോര്‍ക്ക്‌ കിട്ടിയ ഇരട്ടപ്പേര്‌.
*2 മയക്കുവെടി - എന്നാല്‍ ക്ലാസ്സ്‌ അത്രയ്ക്കും ബോറ്‌ എന്ന്

അതുപോലെ ...
നാട്ടിലൊക്കെ വിക്കണത്‌ മോര്‌
മോര്‌ വിക്കണ പെണ്ണിന്റെ പേര്‌ മീര..
മീര വിക്കണ മോര്‌ വേണമാ?
മോര്‌ വിക്കണ മീര വേണമാ?

പിന്നെ സൂചി വിക്കണ പെണ്ണിന്റെ പേര്‌ സൂസി
ആണി വിക്കണ പെണ്ണിന്റെ പേര്‌ ആനി....

അങ്ങനെ പെണ്‍കുട്ടികള്‍ക്ക്‌ പാരവച്ച്‌ ഉള്ള ഇന്‍സ്റ്റന്റ്‌ പാട്ടും.. (മീര വേണമാ എന്ന ചൊദ്യത്തില്‍ ദുരുദ്ദേശമൊന്നും ഇല്ല :).. പ്രാസം ഒപ്പിയ്കുന്നതിന്‌ മാത്രമാണ്‌... സംശയിയ്ക്കുന്നവര്‍ക്കായി നേരത്തെ ക്ലാരിഫൈ ചെയ്യുന്നു)

എന്നെ എപ്പോഴും അഭിമാനിപ്പിച്ചിട്ടുള്ള ഒരു കാര്യം കേരളാ ക്യാമ്പസുകളിലല്ലാതെ തെലുങ്കനോ, തമിഴനോ ഒന്നും സ്വന്തമായി ഈ വക ഒന്നുമില്ല എന്നതാണ്‌. :) അപൂര്‍വ്വം സിനിമ പാട്ടുകളും ബേന്‌ഗ്ലൂറില്‍ വച്ചു കേട്ട
open the door darling open
the door why are you angry so..?
എന്ന ഒരു പാട്ടുമാണ്‌ കുറച്ചെങ്കിലും അവരുടെ മാനം കാത്ത്‌ പോന്നത്‌..



ബാക്കി വരികള്‍ അറിയുന്നവര്‍ reply ആയി post ചെയ്താല്‍, ഞാന്‍ പുതിയ version compile ചെയ്യാം.

EDIT 1: 6/9/2006 വെമ്പള്ളിയുടെ സംഭാവന ചേര്‍ക്കുന്നു..



Friday, May 26, 2006

കേരളം...കേരളം...കൊച്ചു കൊച്ചു കേരളം...

വളരേ creative ആയ ഒരുപാടു മലയാളം ബ്ലോഗുകള്‍ കണ്ടപ്പോള്‍ എനിക്കും ബ്ലോഗാന്‍ ആശ പക്ഷെ, കയ്യിലാണെങ്കില്‍ സാഹിത്യം കഥ കവിത ഒന്നുമില്ല. ഏന്തു ബ്ലോഗും എന്നു അന്തിച്ചു നില്‍ക്കുമ്പോഴാണു കുട്ട്യേടത്തിയുടെ ബ്ലോഗില്‍ ഈ കോളേജ്‌ കാലത്തെ പാട്ടിനെ പരമര്‍ശിച്ചു കണ്ടത്‌.. അതൊരു പിടി വള്ളിയായി.. കുട്ട്യേടത്തിയ്ക്കു നന്ദി രേഖപ്പെദുത്തുന്നു...

ഓര്‍മയില്‍ നിന്നും കുറേ വരികള്‍ കൂടി ചേര്‍ക്കുന്നു...
******************************************
കേരളം...കേരളം...കൊച്ചു കൊച്ചു കേരളം...
(Chorus)കേരളം...കേരളം...കേരളം മനോഹരം

കേരളം...കേരളം...സുന്ദരമാം കേരളം...
(Chorus)കേരളം...കേരളം...കേരളം മനോഹരം

പരശുരാമന്‍ മഴുവെറിഞ്ഞു പൊങ്ങി വന്ന കേരളം...
(Chorus)കേരളം...കേരളം...കേരളം മനോഹരം

കടലുതാണ്ടി കപ്പലേറി "ഗാമ" വന്ന കേരളം...
(Chorus)കേരളം...കേരളം...കേരളം മനോഹരം

അരി ഇടിച്ചു പൊടി വറുത്തു പുട്ടു ചുട്ട കേരളം....
(Chorus)കേരളം...കേരളം...കേരളം മനോഹരം

സെറ്റുടുത്ത മങ്കമാരു പുട്ടുതിന്ന കേരളം....
(Chorus)കേരളം...കേരളം...കേരളം മനോഹരം

ഉഴുന്നരച്ചു നടുതുളച്ചു വടകള്‍ ചുട്ട കേരളം
(Chorus)കേരളം...കേരളം...കേരളം മനോഹരം

കട്ടന്‍ ചായ കുപ്പീലാക്കി "ലിക്കര്‍" ആക്കി കേരളം...
(Chorus)കേരളം...കേരളം...കേരളം മനോഹരം

കൊടി പിടിച്ചു കൊടി പിടിച്ചു കുഴിയിലായ കേരളം..
(Chorus)കേരളം...കേരളം...കേരളം മനോഹരം

പടവലങ്ങ കല്ലുകെട്ടി വളവു തീര്‍ത്ത കേരളം...
(Chorus)കേരളം...കേരളം...കേരളം മനോഹരം

നാടന്‍ വാറ്റു "കളറു" ചേര്‍ത്തു "ഫോറിന്‍" ആക്കി കേരളം..
(Chorus)കേരളം...കേരളം...കേരളം മനോഹരം

മദാമ്മയേ വഴിയിലിട്ടു തുണിയുരിഞ്ഞ കേരളം..
(Chorus)കേരളം...കേരളം...കേരളം മനോഹരം

കള്ളടിച്ചു കള്ളടിച്ചു കണ്ണു പോയ കേരളം..
(Chorus)കേരളം...കേരളം...കേരളം മനോഹരം

മണ്ണു മാന്തി കൂന കുത്തി കപ്പ നട്ട കേരളം..
(Chorus)കേരളം...കേരളം...കേരളം മനോഹരം

ജോസഫുള്ള മാണിയുള്ള പിള്ളയുള്ള കേരളം..
(Chorus)കേരളം...കേരളം...കേരളം മനോഹരം

കേരളം...കേരളം...കൊച്ചു കൊച്ചു കേരളം..
(Chorus)കേരളം...കേരളം...സുന്ദരമാം കേരളം...

**********************************
ബാക്കി വരികള്‍ അറിയുന്നവര്‍ reply ആയി post ചെയ്താല്‍, ഞാന്‍ പുതിയ version compile ചെയ്യാം.
5/30/06 Edited : vemballiയുടെ സംഭാവന ചേര്‍ക്കുന്നു